"محمد رمضان طلع علينا بخبر أنه جاله دعوة من لارا ترامب زوجة ابن الرئيس الأمريكي ترامب، أنه يروح يحضر معاها حفل في البيت الأبيض وتتصور معاه احتفاء به وبنجوميته وشعبيته كونه رمز مصري وأفريقي وكلنا قولنا دي حاجة حلوة، لارا ترامب وآل ترامب والبيت الأبيض عارفين محمد رمضان ووجهوله دعوة دي حاجة حلوة، ثم في 24 ساعة كل الناس قعدت تدور لحد ما البعض اكتشف أن القصة كما يقولون مش دعوة".

🔴 اللي بيحصل دلوقتي محصلش من يوم إعلان قيام إسرائيل تقريبًا... أمريكا تقريبًا كده بطلت تعتبرها حليف، وترامب بيتخلى عن نتنياهو سياسيًا!

لأول مرة من بداية تاريخهم مع بعض تقريبًا، أمريكا دلوقتي بدأت تاخد قراراتها الكبرى في الشرق الأوسط من غير ما ترجع لتل أبيب... بل بالعكس، بتتحرك ضد رغبات اسرائيل، وبتعزل نتنياهو تمامًا عن أي تفاوض أو مشاركة في اللي بيحصل!

⚫ طب ازاي بقى وإيه اللي حصل ما بينهم؟! وليه أمريكا فجأة رمت كل العلاقات الدبلوماسية والتاريخ الاستراتيجي الطويل اللي بيجمعها بإسرائيل ورا ضهرها؟!

حضر بقى كوباية شايك الحلوة والنعناع، وتعالى أحيلك اللي حصل في الكام ساعة اللي فاتوا، وازاي خريطة النفوذ والقوى في الشرق الأوسط بتتغير للأبد... وخلينا ناخد المواضيع واحد واحد وبالترتيب...

🔴 شوف يا سيدي..
من كام يوم فاتوا، أمريكا أعلنت فجأة عن هدنة مفاجئة مع الحوثيين في اليمن، بعد ما كانت بتحاربهم بشكل رسمي وبتقصفلهم مواقعهم، وهما بيضربولها سفنها في البحر الأحمر... والغريب في الموضوع ان الهدنة دي تم الإعلان عنها فجأة وبدون مقدمات، في الوقت اللي اسـ،ـرائيل كانت فيه لسه بتضرب مواقع في صنعاء، وبتحاول تاخد دعم أمريكي لضربات أوسع...

🟢 لكن فجأة أمريكا أعلنت عن اتفاق لوقف اطلاق النار في اليمن مقابل وقف الحوثيين لاستهداف السفن الأمريكية... والأغرب ان الموضوح حصل بدون حتى اتصال بنـ،ـتنياهو!
ولما اسرائيل اتضايقت، السفير الأمريكي في اسرائيل بنفسه قالهم نصًا: "احنا مش ملزمين نستأذن من حد لما نقرر نأمن نفسنا"...
والموضوع موقفش هنا!

🔴 ترامب بعدها بكام ساعة، وتحديدًا امبارح، أعلن عن جولة خليجية ضخمة، هيقابل فيها قادة السعودية والإمارات وقطر، وهيوقع معاهم صفقات جديدة، ويعلن عن "أكبر خبر في الشرق الأوسط" على حد تعبيره...
بس إيه الغريب؟ الجولة دي كلها هتتم من غير ما يمر على إسرائيل... ولا حتى مكالمة!
طب ده بيحصل ليه؟!

🔵 التقارير الصحفية اللي اتنشرت في الصحف الإسرائيلية والأمريكية بتقولك إن ترامب "محبط جدًا" من نتنياهو، وعارف إنه بيماطل وبيعطل أي صفقة مع السعودية، وخصوصًا التطبيع... بل وكمان متضايق من محاولات تل أبيب إنها "تسحبه" لضرب إيران غصب عنه.. وعشان كده فالعلاقة الشخصية ما بينهم هما الاتنين تدهورت جدًا ومبقوش طايقين بعض...

🟠 بس أهم حاجة فيهم بقى، واللي هي فعليًا حاجة محدش كان متوقعها، هي ان ترامب امبارح أعلن عن خطة ضخمة هتنفذها أمريكا بنفسها لتوزيع مساعدات إنسانية على أهل غزة... بس بشرط غريب جدًا:
إسرائيل مالهاش دعوة بالمساعدات دي خالص!
لا طيارات إسرائيلية، لا تنسيق ميداني، ولا إشراف أمني...

🟣 طب مين اللي هينفذ؟
شركات خاصة بتأمين دولي، من غير تدخل الجيش الإسرائيلي بأي شكل.. والسفير الأمريكي نفسه اتكلم عن الخطة دي، ووضح إنهم بيعملوا كده عشان مش عايزين العملية دي تبان بأي شكل وكإنها بتتم بالتنسيق مع الاحتلال.. عشان يحافظوا على صورة أمريكا الدولية!
يعني ترامب عايز يقدم نفسه كمنقذ للوضع الانساني في غزة، من غير ما يدي إسرائيل أي فضل أو دور في اللي بيحصل...

⚫ طب هنا بقى ييجي السؤال المهم... هو ليه فجأة أمريكا قررت تعمل كده؟!
🟠 الأسباب يا صديقي مهمة جدًا، ولو فهمتها هتقدر تستوعب ايه اللي بيحصل في الشرق الأوسط دلوقتي والأمور رايحة على فين... تعالى كده أقولك عليها سريعًا وبالترتيب...

1️⃣ أول حاجة، ترامب دلوقتي غرقان في احصائيات التأييد الشعبي جوه أمريكا وعايز أي نصر خارجي يغطي بيه فشله الداخلي.. شعبيته في الحضيض، والتضخم والغضب الشعبي من سياسة التعريفات الجمركية بتاعته كاتمين على نفسه، لدرجة ان وسائل الإعلام والاحصائيات بتعتبر الكام شهر اللي عدوا من حكمه دول هما أسوأ بداية لأي رئيس أمريكي على مر التاريخ!
وكنتيجة لده، فهو دلوقتي بيحاول يلم استثمارات من الخليج بأي تمن، عشان يحافظ على صورته وشعبيته بأي انتصار... حتى لو ده معناه انه يبيع نتنياهو اللي هو كان دايما الحليف رقم 1!

2️⃣ تاني حاجة السعودية من قريب بردو ضغطت على أمريكا بموضوع التطبيع، وحطته كمقابل لوقف الحرب في غزة.. يعني باختصار مش هنقعد ونتكلم في تطبيع الا بعد توقف الحرب.. وطبعًا نتنياهو مش عايز يوقف الحرب، لإنها لو توقفت وانتهت ف ده هيكون معناه نهايته وسقوطه هو وحزبه ويمكن يتم محاكمته كمجر..م حر...ب كمان..

3️⃣ تالت حاجة هي ان الجرايم اللي بتحصل في غزة كل يوم ومشاهد الإبادة والحصار اللي عليها بقت محرجة جدًا للعالم كله، حتى أقرب حلفاء إسرائيل مش قادرين يبرروها... وترامب مش عايز يشيل العار ده ويتربط بإسمه في التاريخ انه سمح باستمراره...

4️⃣ رابع حاجة وهي الخلاف الشخصي بين ترامب ونتنياهو.. الموضوع كان واضح جدًا في اخر لقاء تم بينهم في البيت الأبيض، وواضح في عدم التنسيق اللي ما بينهم والفتور اللي حاصل من ساعتها... والمشكلة ان كل واحد فيهم بيستغل التاني وهو عارف انه بيستغله... وكلها لعبة مصالح وسياسة.. ترامب كان بيدعم نتنياهو عشان ينفذ التهجير ع الأرض... بس لما نتنياهو فشل في تنفيذ التهجير، وعايز يجر رجل ترامب معاه انه يتدخل، ترامب تقريبًا قرر انه يضحي بيه ويسيبه يغرق لوحده..

🔴 ودلوقتي؟! حتى الإعلام الإسرائيلي بقى شايف انهم مهمشين في التحركات الأمريكية.. صحيفة جيروسالم بوست نزل عليها تقرير بيقول ان امريكا مبقتش تنسق معاهم وبتشتغل من وراهم، وهتلاقي التقرير في الكومنتات.. وحتى مستشار الأمن القومي السابق قال في لقاء إذاعي ان إسرائيل دلوقتي أصبحت برا الحسابات الأمريكية... والموضوع أخطر مما الناس فاهمة!

🟣 فهل أمريكا فعلاً بدأت تتخلى عن إسرائيل؟!
كل المؤشرات دلوقتي بتقول: آه... وبشكل غير مسبوق... في شرخ حصل ما بينهم، والثقة اتكسرت، ونتنياهو واصراره على الحرب والإبادة أصبح عبء مش أصل استراتيجي زي ما كان..
ولو فضل الحال على كده، ف احتمال كبير جداً إننا نكون على أعتاب بداية نهاية "العصر الذهبي" للعلاقات الأمريكية-الإسرائيلية!

🟢 الوقت اللي احنا فيه ده هو فرصة ذهبية.. لو قدر العرب يستغلوا اللحظة دي، ويضغطوا سياسيًا واقتصاديًا بحكمة، ف ممكن فعلاً نشوف تغيير استراتيجي حقيقي... مش بس في غزة، لكن في الخريطة كلها.. ونهاية نتنياهو ممكن تكون أقرب مما تتخيل!

🔴🟣🔵 وعشان نكون واضحين.. بقول (نهاية نتنياهو) وليس (نهاية اسرائيل او تخلى أمريكا عنها بشكل نهائي).. لإن كلنا عارفين ان اسرائيل هي امتداد لولاية امريكية في الشرق الأوسط مش اكتر.. بس اللي بيحصل هو تغير استراتيجي في طريقة التعامل السياسي بينهم، وومكن جدا يكون ترامب بيرمي نتنياهو للنار عشان مبقاش متوافق مع مصالحه مش أكتر.. والسبب هو اللي بيعمله نتنياهو واللي اصبح صعب على المجتمع احتماله اكتر من كده... ف ربك يسهل يعني ويا رب تكون بداية لنهاية الحرب والإبادة..
اللي متابع السياسة من سنين، عمره ما كان يتخيل اللحظة دي تيجي... بس هي جت فعلاً، وبتتكتب دلوقتي قدام عيوننا كلنا...

🔴 أمريكا دلوقتي على بُعد أسابيع من صدمة اقتصادية تاريخية محصلتش قبل كده... والسبب؟ ترامب وسياساته المتهورة اللي وضعت أمريكا دلوقتي على حافة انهيار اقتصادي تاريخي ممكن يؤدي لإفلاس مئات الشركات الصغيرة في أمريكا، ويخلي الفقراء الأمريكيين أكثر فقرًا!

⚫️ طب ازاي؟!
لو انت مش متابع اللي حصل في العالم في آخر كام يوم بسبب الحرب التجارية بين الصين وأمريكا، تعالى بقى وحضّر كوباية شايك ونعناعك وروق كده ☕، وخليني أحكيلك ازاي ترامب ممكن يكون دخل أمريكا في أزمة اقتصادية أكبر من الكساد العظيم، وازاي الشعب الأمريكي وخصوصًا الطبقات الفقيرة هو اللي هيدفع التمن!

🔵 شوف يا سيدي... من ساعة ما ترامب فرض رسوم جمركية خرافية وصلت لـ 145% على المنتجات الصينية، والتجارة في العالم كله اتجننت... الشركات الأمريكية والمستهلكين دلوقتي مش عارفين يلاقوها منين ولا منين!
زيادات كبيرة وضخمة في الأسعار، ومشاكل في سلاسل التوريد وفوضى في جداول الشحن لكل شركات التجارة الإلكترونية تقريبًا!

🟣 والكارثة إن الموضوع لسه في بدايته، ولسه تأثيره الكبير مجاش.. بس التقارير الاقتصادية بتقول إن اللي جاي أخطر وأعنف بكتير مما الناس متصورة!
خليني أحكيلك ازاي...

🟢 حسب تقرير نشرته مجلة The Economist الاقتصادية، فخلال آخر أسبوع بس، الحجوزات الجديدة للسفن اللي جاية من الصين لأمريكا نزلت بنسبة 45%... وحوالي 40% من رحلات السفن بين البلدين اتلغت بالفعل أو اتحولت لموانئ تانية زي فيتنام... والسبب؟ الشركات الأمريكية مش عارفة تتحمل تكلفة الرسوم الجنونية دي، وبتلغي كل الشحنات اللي كانت بتشتريها قبل كده من الصين بأسعار رخيصة!

🟡 عشان تفهم أكتر، خليني أديك مثال بسيط:
حسب تقارير اقتصادية نشرتها (بلومبرج)، شركة الملابس الصينية المعروفة Shein اضطرت ترفع أسعار منتجاتها في أمريكا في يوم وليلة بنسبة وصلت لـ377%
ومش بس Shein.. ده كمان موقع TEMU الصيني اللي كان قالب الدنيا في العالم بسبب أسعاره الرخيصة، اضطر هو كمان يرفع أسعاره بشكل كبير بسبب تعريفات ترامب الجمركية اللي غلت عليهم أسعار الشحن وخلتهم يدفعوا جمارك ضخمة..

🟠 الشركات دي قبل كده يا صديقي كانوا بيستعملوا ثغرة في القانون الأمريكي اسمها De Minimus.. الثغرة دي كانت بتسمح لهم يدخلوا شحناتهم لأمريكا بدون جمارك طول ما هي تحت الـ 800 دولار، وكان قايم عليها الـ Business Model بتاعهم كلهم، وعشان كده أسعارهم كانت رخيصة وبتضرب أي شركة جوه أمريكا بالجزمة.. بس دلوقتي لما ترامب لغى الثغرة دي ورفع عليهم الجمارك بنسبة 145%، بقوا مضطرين يبيعوا بأسعار أعلى كمان من أي شركات تانية!
يعني تخيل مثلًا فوطة مطبخ كان سعرها 1.28 دولار بس على TEMU، تاني يوم بقت بـ 6.10 دولار!

🟣 طب إيه اللي هيحصل للمستهلك الأمريكي؟
المستهلك الأمريكي العادي – خصوصًا الطبقة المتوسطة والفقيرة – حرفيًا مبقاش عارف يجيب احتياجاته اليومية منين دلوقتي..
الفقرا في أمريكا حاليًا مبقوش عارفين يشتروا لا من Temu ولا حتى من المولات الأمريكية اللي زي Walmart، اللي هما أصلًا أسعارهم كانت غالية على الفقرا.. والكارثة هي إن حسب إحصائيات عملتها جامعة Yale وجامعة UCLA في أمريكا، فحوالي 48% من شحنات الصين كانت رايحة لأفقر المناطق في أمريكا!
يعني ترامب بيلعب بالنار... واللي هيتلسع مين؟ الطبقة اللي أصلاً مش قادرة تعيش!

🟡 والمشكلة الكبيرة هي ان ده مش بس بيأثر على المستهلك، لأ ده كمان بيدمر الشركات الأمريكية الصغيرة اللي بتعتمد على الصين في استيراد منتجاتها!

مدير شركة Flexportالأمريكية المتخصصة في الشحن واللوجستيات قال مؤخرًا في بودكاست إن حوالي 80% من الشركات الصغيرة الأمريكية اللي بتستورد من الصين ممكن "تفلس تمامًا" بسبب قرارات ترامب دي..
والسبب حسب كلامه هو أن المنتجات التي بتستوردها الشركات دي تعتبر تعتبر سلع "غير أساسية".. ولو أسعارها زادت زي ما بيحصل دلوقتي، فالمستهلكين في أمريكا هيتخلوا عنها ببساطة.. أيه اللي يخلي حد مثلًا يروح يشتري فرن بيتزا بـ 400 دولار من TEMU، وهو يقدر يجيب بيتزاية كاملة من دومينوز بأقل من 5 دولار؟!

🔵 وطبعًا لما المستهلك الأمريكي يبطل يشتري، ده معناه انهيار في حركة البيع وكساد وانهيار في سلاسل التوريد، وكنتيجة لده هيحصل تخفيش للعمالة وممكن شركات كاملة تفلس.. وفجأة آلاف الأمريكيين اللي بيشتغلوا في الشركات دي هيلاقوا نفسهم بدون شغل!

🔴 ولسه بقى الصدمة الأكبر في الطريق:
الرسوم الجمركية دي بحسب تقرير معهد ITEP الاقتصادي، هتسبب ارتفاع في الأسعار هيكون عبئه على أفقر 20% من الأمريكيين بنسبة 6.2% من دخلهم السنوي!
يعني ترامب بدل ما يحمي اقتصاد بلده، دمر مستقبل ملايين الأسر اللي عايشة أصلاً بالعافية!

⚫️ والكارثة إن ترامب نفسه بدأ يحس بالخطر وقال في مؤتمر صحفي في البيت الأبيض من قريب إنه "ممكن يتراجع في وقتٍ ما" عشان لو الأسعار زادت أكتر من كده، فالأمريكيين مش هيقدروا يشتروا حاجة.. بس الكلام ده جه متأخر جدًا!

الاقتصاد بدأ فعلاً ينهار، والأسواق الأمريكية دخلت في حالة هلع، والشركات الكبيرة والصغيرة بدأت تتجمد وتتراجع عن الاستثمار والتوظيف.. وشركات كتير أمريكية بدأت تدور على طريقة تهرب بيها من الجمارك، وبعضهم في معرض كانتون الدولي اللي شغال دلوقتي في الصين راحوا لشركات هندية وطلبوا منهم يشتروا الشحنات بتاعتهم من الشركات الصينية ويودوها الهند، وبعدين يجيبوا من الهند لأمريكا عشان يهربوا من الجمارك، خصوصًا إن الهند عليها رسوم بنسبة 10% بس!

🔴 طب هو الصين بتعمل ايه بقى قصاد كل ده؟
المفاجأة يا صديقي إن الصين بتنفذ خطة ذكية جدًا عشان تتجاوز بيها الأزمة.. والخطة دي تتلخص في إنها بدل ما تعتمد على السوق الأمريكي اللي اتقفل في وشها، قررت تحوّل مبيعاتها الضخمة للسوق المحلي الصيني نفسه!
إزاي؟
شركات زي Alibaba و Pinduoduo بدأوا حملات ضخمة بمليارات الدولارات عشان يساعدوا الشركات الصينية اللي بتصدر لأمريكا إنها تبيع منتجاتها جوه الصين، وتشجع التجار على تخفيض أسعارهم وتوجيه الطاقة الانتاجية بتاعتهم للمستهلك الصيني بدل الأمريكي..

🟢 يعني ببساطة، الصين بتحاول تستبدل السوق الأمريكي بسوق الداخلي الضخم اللي فيه مليار ونص مستهلك جاهزين يشتروا لو الأسعار مناسبة!

⚫️ كمان الحكومة الصينية بتشجع شركات التكنولوجيا الكبيرة زي Tencent وAlibaba إنها تلعب دور اجتماعي كبير، عشان الاقتصاد الصيني ماينهارش بسبب انغلاق السوق الأمريكي قدامهم.. وده طبعًا في إطار حملة كبيرة من بكين اسمها "الاعتماد على الذات"، عشان يحصّنوا الاقتصاد من أي عقوبات أمريكية مستقبلية.

لو الخطة دي نجحت (والأرقام والمؤشرات الأولية بتقول إنها فعلاً ماشية كويس جدًا)، فالصين هتقدر تعدّي أصعب مرحلة في الحرب التجارية دي بدون خسائر كبيرة، في حين إن اللي هيدفع تمن الأزمة الحقيقية هيكون المستهلك الأمريكي، خصوصًا الطبقات الفقيرة اللي مش قادرة تتحمل الزيادات الجنونية دي!

🟠 يعني ترامب في النهاية ممكن يكتشف إنه أضر باقتصاد بلده أكتر ما أضر بالصين!
الصين دلوقتي بتعمل كل حاجة عشان تتجنب الأضرار، وتخلق لنفسها سوق بديل، في حين إن أمريكا هي اللي بتواجه خطر التضخم والإفلاس والبطالة!
ف تفتكر انت مين الخسران الأكبر فعلًا في الحرب دي؟ أمريكا ولا الصين؟

🔴 ترامب يا صديقي كان فاكر إنه بيعاقب الصين... بس الحقيقة إنه عاقب الشعب الأمريكي نفسه... ودلوقتي أمريكا داخلة على مرحلة حرجة جدًا بسبب قراراته المتهورة اللي واضح انه محسبهاش كويس أو متوقعش رد الفعل عليها ممكن يوصل لفين...
المستهلكين مرعوبين، الشركات بتقفل أبوابها، والمستثمرين بيهربوا من الدولار وبيتجهوا للدهب، والصين نفسها بتشتري دهب بكميات تاريخية هكلمك عنها ف مقال جاي...
وكل ده اتسبب في ان الاقتصاد الأمريكي دلوقتي أصبح بينزف قدام العالم كله..

🔵 فهل دي بداية النهاية للقوة الاقتصادية الأمريكية؟
وهل ترامب هيكون سبب بداية انكماش أكبر اقتصاد في العالم؟
الله أعلم.. بس كل المؤشرات الحالية بتقول إن أمريكا على أبواب كارثة اقتصادية تاريخية، وكل ده بسبب شخص قرر يدخل حرب تجارية متهورة بدون أي حسابات!

🔴🔵 وفي النهاية، لو البوست عجبك ووصلت لحد هنا، متنساش تعمل شير عشان يوصل لغيرك ويعرف اللي بيحصل في اقتصاد العالم حواليه، وكمان عشان تدعم المجهود اللي ببذله في كتابة الموضوعات الصعبة دي..
وكالعادة هتلاقي مصادر لكل الأرقام والاحصائيات والتقارير الاقتصادية اللي اتكلمت عنها في البوست تحت في الكومنتات 👇