🔴 الكنيست وافق رسميًا على خطة احتلال غزة.. والأقمار الصناعية من شوية رصدت مشهد مخيف بيحصل على حدود القطاع دلوقتي...
صفوف طويلة من الدبابات والعربيات المدرعة والمعدات الثقيلة، ومعاها حدات هندسية وكتائب احتياط... كلها بتتحشد بشكل مرعب على طول الحدود!
⚫️ والصور دي مش مجرد حركات استعراضية ولا مناورات... بل هي استعداد فعلي لاجتياح بري شامل، اتوصف من خبراء عسكريين إنه هيكون أكبر هجوم من إسرائيل على غزة من بداية الحرب في 2023... بل ممكن يكون الأكبر من 2008 أصلًا!
طيب هو إيه اللي حصل خلال الساعات اللي فاتت واحنا مش متابعين؟ 👇
🔴 شوف... النهارده الفجر واحنا نايمين، حكومة الاحتلال الإسرائيلي وافقت رسميًا على خطة نتنياهو باحتلال مدينة غزة بالكامل اللي انا كلمتك عنها في بوست فات من كام يوم، وكنت قلتلك انها اتسربت للصحافة... والموافقة دي جت أخيرًا في جلسة كابينت جوه الكنيست، استمرت لمدة أكتر من 10 ساعات وسط اعتراض شديد من قيادات الجيش ومسئولين أمنيين سابقين!
والمرة دي بقى، الخطة مش بس عسكرية زي كل مرة... بل هي خطة هدفها الأساسي هو التفريغ والتهجير، وبشكل كامل ونهائي وبلا عودة...
🔵 الخطة المرة دي بتتكون من أكتر من مرحلة، والمفروض حسب المصادر العسكرية الإسرائيلية انها هتتنفذ على 5 شهور... أول مرحلة منها هتتضمن وقف شامل للمساعدات عن القطاع لإجبار السكان على الخروج، تمهيدًا لعمليات الاقتحام وعشان تكون أسهل بدون مدنيين.. ده حسب كلامهم طبعًا...
وبحسب مصادر عبرية وأميركية، فالـ Deadline أو الموعد النهائي اللي حدده الاحتلال لإخلاء مدينة غزة بالكامل هو 7 أكتوبر 2025، اللي هو نفس يوم الهجوم اللي بدأ الحرب... وده طبعًا اختيار له رمزية كبيرة عندهم زي ما انت شايف...
🟢 الفكرة بقى ان قيادات الجيش نفسهم خايفين ورافضين الخطة دي، وشايفينها كارثة على الكيان نفسه...
رئيس الأركان "إيال زامير" حذّر نتنياهو قدام الكل، وقاله إن احتلال غزة بالكامل ممكن ياخد سنتين، وهيعرّض حياة الرهائن والجنود لخطر كبير، ومفيش أي فائدة استراتيجية حقيقية من المغامرة دي...
🟣 ومش بس كده... ده في رفض كامل على مستوى عالمي للخطة دي، من كل دول العالم تقريبًا ما عدا أمريكا اللي مدية الضوء الأخضر لنتنياهو، و"ترامب" قال من يومين لما اتسأل عن الخطة بعد ما اتسربت إن الموضوع يتوقف على نتنياهو وهو مش هيتدخل!
على الناحية التانية؛ ألمانيا من شوية وقفت صادرات السلاح لإسرائيل، وفرنسا وبريطانيا وكندا وأستراليا، والاتحاد الأوروبي كله تقريبًا، بالإضافة لـ مصر والأردن وتركيا، كلهم أدانوا الخطة ووصفوها بإنها "جريمة حرب" بيتم الإعلان عنها أمام العالم كله...
🟡 وكمان الأمم المتحدة قالت إن القرار ده هيسبب مجازر غير مسبوقة في تاريخ الصراع، وأعنف من أي شيء حصل من بدايته، بالإضافة لبداية تنفيذ تهجير قسري مباشر، وإنه هيأدي لمجاعات كارثية أضخم من اللي بتحصل دلوقتي...
وبرغم كل ده، نتنياهو ما زال مصر على الخطوة دي، وأعلن صراحةً في تصريحات له من شوية نقلها التلفيزيون العبري إنه مش هيسيب غزة إلا لما "يمحي حـ.ـ.ـمــ.ــ.ـــا.س"، ويسلم المدينة لحكم مدني تحت "السيطرة الأمنية الإسرائيلية"...
ووزير المالية الإسرائيلي بتسلئيل سموتريتش قال في تصريح رسمي للعالم كلهم إنهم: "سيمحوا أي وجود للدولة الفلسطينية مستقبلًا..."
🟠 وبسبب ده، فأهالي الأسرى الإسرائيليين دلوقتي بيتظاهروا بشكل عنيف جدًا في قلب تل أبيب، والشرطة بتتعامل معاهم بطرق عنيفة وبتضرب عليهم قنابل غاز وبتستخدم خراطيم المية لتفريقهم، وبعضهم قالوا في تصريحات للتلفيزيون شيء خطير جدًا محدش واخد باله منه، برغم إنه هيبينلك خطورة اللي على وشك الحدوث...
🟢 قالو ان نتنياهو خلاص قرر يضحي بالأسرى اللي باقيين كلهم... الـ 20 واحد اللي باقيين لسه على قيد الحياة، نتنياهو عايزهم كلهم يموتوا، وعايز يورّط الداخل الإسرائيلي في احتلال غزة للهروب من مسؤولية الأسرى، وعشان يبقى مبرر كامل ونهائي له إنه يدمر القطاع بالكامل وينفذ كل الأهداف السياسية اللي في دماغه، ويأجل قرار محاكمته اللي شغالة في القضاء الصهيوني دلوقتي...
🔹️ طيب لما الهجوم يحصل، أيه المتوقع؟
حــ.ــ.ــ.ــمـــ.ـــ.ــــا.س قالت إنها مش هتسلم سلاحها وهتدافع عن القطاع لآخر نفس، وفصائل المقاومة كلها رفعت حالة التأهب القصوى... ولو إسرائيل اقتحمت فعلاً، وارد جدًا نشوف هجمات من الجنوب اللبناني، أو من الحوثيين في البحر الأحمر، أو حتى تصعيد من إيران أو العراق...
🟡🟠 يعني الخلاصة: الخطة اللي متوقع يبدأ تنفيذها خلال أيام أو ساعات هتكون الأخطر من بداية الحرب كلها، وهتكون تصعيد أخير لمرحلة هتعدي سقف ما هو مسموح، وهتتجاوز كل الخطوط الحمراء...
إحنا دلوقتي في الساعات الأخيرة قبل الانفجار الكبير...
يا إما العالم يتحرك ويوقف المجزرة اللي جاية، يا إما هنشوف غزة بتتمسح من على الخريطة حرفيًا... على الهواء مباشرة...
🔴 هسيبلك المصادر في أول كومنت كالعادة 👇 ولو وصلت لهنا، متنساش تشارك المقال مع الناس من خلال الشير، عشان الكل يعرف اللي حصل الساعات اللي ساعات الماضية، واللي على وشك الحدوث...

🔴 اللي بيحصل دلوقتي محصلش من يوم إعلان قيام إسرائيل تقريبًا... أمريكا تقريبًا كده بطلت تعتبرها حليف، وترامب بيتخلى عن نتنياهو سياسيًا!

لأول مرة من بداية تاريخهم مع بعض تقريبًا، أمريكا دلوقتي بدأت تاخد قراراتها الكبرى في الشرق الأوسط من غير ما ترجع لتل أبيب... بل بالعكس، بتتحرك ضد رغبات اسرائيل، وبتعزل نتنياهو تمامًا عن أي تفاوض أو مشاركة في اللي بيحصل!

⚫ طب ازاي بقى وإيه اللي حصل ما بينهم؟! وليه أمريكا فجأة رمت كل العلاقات الدبلوماسية والتاريخ الاستراتيجي الطويل اللي بيجمعها بإسرائيل ورا ضهرها؟!

حضر بقى كوباية شايك الحلوة والنعناع، وتعالى أحيلك اللي حصل في الكام ساعة اللي فاتوا، وازاي خريطة النفوذ والقوى في الشرق الأوسط بتتغير للأبد... وخلينا ناخد المواضيع واحد واحد وبالترتيب...

🔴 شوف يا سيدي..
من كام يوم فاتوا، أمريكا أعلنت فجأة عن هدنة مفاجئة مع الحوثيين في اليمن، بعد ما كانت بتحاربهم بشكل رسمي وبتقصفلهم مواقعهم، وهما بيضربولها سفنها في البحر الأحمر... والغريب في الموضوع ان الهدنة دي تم الإعلان عنها فجأة وبدون مقدمات، في الوقت اللي اسـ،ـرائيل كانت فيه لسه بتضرب مواقع في صنعاء، وبتحاول تاخد دعم أمريكي لضربات أوسع...

🟢 لكن فجأة أمريكا أعلنت عن اتفاق لوقف اطلاق النار في اليمن مقابل وقف الحوثيين لاستهداف السفن الأمريكية... والأغرب ان الموضوح حصل بدون حتى اتصال بنـ،ـتنياهو!
ولما اسرائيل اتضايقت، السفير الأمريكي في اسرائيل بنفسه قالهم نصًا: "احنا مش ملزمين نستأذن من حد لما نقرر نأمن نفسنا"...
والموضوع موقفش هنا!

🔴 ترامب بعدها بكام ساعة، وتحديدًا امبارح، أعلن عن جولة خليجية ضخمة، هيقابل فيها قادة السعودية والإمارات وقطر، وهيوقع معاهم صفقات جديدة، ويعلن عن "أكبر خبر في الشرق الأوسط" على حد تعبيره...
بس إيه الغريب؟ الجولة دي كلها هتتم من غير ما يمر على إسرائيل... ولا حتى مكالمة!
طب ده بيحصل ليه؟!

🔵 التقارير الصحفية اللي اتنشرت في الصحف الإسرائيلية والأمريكية بتقولك إن ترامب "محبط جدًا" من نتنياهو، وعارف إنه بيماطل وبيعطل أي صفقة مع السعودية، وخصوصًا التطبيع... بل وكمان متضايق من محاولات تل أبيب إنها "تسحبه" لضرب إيران غصب عنه.. وعشان كده فالعلاقة الشخصية ما بينهم هما الاتنين تدهورت جدًا ومبقوش طايقين بعض...

🟠 بس أهم حاجة فيهم بقى، واللي هي فعليًا حاجة محدش كان متوقعها، هي ان ترامب امبارح أعلن عن خطة ضخمة هتنفذها أمريكا بنفسها لتوزيع مساعدات إنسانية على أهل غزة... بس بشرط غريب جدًا:
إسرائيل مالهاش دعوة بالمساعدات دي خالص!
لا طيارات إسرائيلية، لا تنسيق ميداني، ولا إشراف أمني...

🟣 طب مين اللي هينفذ؟
شركات خاصة بتأمين دولي، من غير تدخل الجيش الإسرائيلي بأي شكل.. والسفير الأمريكي نفسه اتكلم عن الخطة دي، ووضح إنهم بيعملوا كده عشان مش عايزين العملية دي تبان بأي شكل وكإنها بتتم بالتنسيق مع الاحتلال.. عشان يحافظوا على صورة أمريكا الدولية!
يعني ترامب عايز يقدم نفسه كمنقذ للوضع الانساني في غزة، من غير ما يدي إسرائيل أي فضل أو دور في اللي بيحصل...

⚫ طب هنا بقى ييجي السؤال المهم... هو ليه فجأة أمريكا قررت تعمل كده؟!
🟠 الأسباب يا صديقي مهمة جدًا، ولو فهمتها هتقدر تستوعب ايه اللي بيحصل في الشرق الأوسط دلوقتي والأمور رايحة على فين... تعالى كده أقولك عليها سريعًا وبالترتيب...

1️⃣ أول حاجة، ترامب دلوقتي غرقان في احصائيات التأييد الشعبي جوه أمريكا وعايز أي نصر خارجي يغطي بيه فشله الداخلي.. شعبيته في الحضيض، والتضخم والغضب الشعبي من سياسة التعريفات الجمركية بتاعته كاتمين على نفسه، لدرجة ان وسائل الإعلام والاحصائيات بتعتبر الكام شهر اللي عدوا من حكمه دول هما أسوأ بداية لأي رئيس أمريكي على مر التاريخ!
وكنتيجة لده، فهو دلوقتي بيحاول يلم استثمارات من الخليج بأي تمن، عشان يحافظ على صورته وشعبيته بأي انتصار... حتى لو ده معناه انه يبيع نتنياهو اللي هو كان دايما الحليف رقم 1!

2️⃣ تاني حاجة السعودية من قريب بردو ضغطت على أمريكا بموضوع التطبيع، وحطته كمقابل لوقف الحرب في غزة.. يعني باختصار مش هنقعد ونتكلم في تطبيع الا بعد توقف الحرب.. وطبعًا نتنياهو مش عايز يوقف الحرب، لإنها لو توقفت وانتهت ف ده هيكون معناه نهايته وسقوطه هو وحزبه ويمكن يتم محاكمته كمجر..م حر...ب كمان..

3️⃣ تالت حاجة هي ان الجرايم اللي بتحصل في غزة كل يوم ومشاهد الإبادة والحصار اللي عليها بقت محرجة جدًا للعالم كله، حتى أقرب حلفاء إسرائيل مش قادرين يبرروها... وترامب مش عايز يشيل العار ده ويتربط بإسمه في التاريخ انه سمح باستمراره...

4️⃣ رابع حاجة وهي الخلاف الشخصي بين ترامب ونتنياهو.. الموضوع كان واضح جدًا في اخر لقاء تم بينهم في البيت الأبيض، وواضح في عدم التنسيق اللي ما بينهم والفتور اللي حاصل من ساعتها... والمشكلة ان كل واحد فيهم بيستغل التاني وهو عارف انه بيستغله... وكلها لعبة مصالح وسياسة.. ترامب كان بيدعم نتنياهو عشان ينفذ التهجير ع الأرض... بس لما نتنياهو فشل في تنفيذ التهجير، وعايز يجر رجل ترامب معاه انه يتدخل، ترامب تقريبًا قرر انه يضحي بيه ويسيبه يغرق لوحده..

🔴 ودلوقتي؟! حتى الإعلام الإسرائيلي بقى شايف انهم مهمشين في التحركات الأمريكية.. صحيفة جيروسالم بوست نزل عليها تقرير بيقول ان امريكا مبقتش تنسق معاهم وبتشتغل من وراهم، وهتلاقي التقرير في الكومنتات.. وحتى مستشار الأمن القومي السابق قال في لقاء إذاعي ان إسرائيل دلوقتي أصبحت برا الحسابات الأمريكية... والموضوع أخطر مما الناس فاهمة!

🟣 فهل أمريكا فعلاً بدأت تتخلى عن إسرائيل؟!
كل المؤشرات دلوقتي بتقول: آه... وبشكل غير مسبوق... في شرخ حصل ما بينهم، والثقة اتكسرت، ونتنياهو واصراره على الحرب والإبادة أصبح عبء مش أصل استراتيجي زي ما كان..
ولو فضل الحال على كده، ف احتمال كبير جداً إننا نكون على أعتاب بداية نهاية "العصر الذهبي" للعلاقات الأمريكية-الإسرائيلية!

🟢 الوقت اللي احنا فيه ده هو فرصة ذهبية.. لو قدر العرب يستغلوا اللحظة دي، ويضغطوا سياسيًا واقتصاديًا بحكمة، ف ممكن فعلاً نشوف تغيير استراتيجي حقيقي... مش بس في غزة، لكن في الخريطة كلها.. ونهاية نتنياهو ممكن تكون أقرب مما تتخيل!

🔴🟣🔵 وعشان نكون واضحين.. بقول (نهاية نتنياهو) وليس (نهاية اسرائيل او تخلى أمريكا عنها بشكل نهائي).. لإن كلنا عارفين ان اسرائيل هي امتداد لولاية امريكية في الشرق الأوسط مش اكتر.. بس اللي بيحصل هو تغير استراتيجي في طريقة التعامل السياسي بينهم، وومكن جدا يكون ترامب بيرمي نتنياهو للنار عشان مبقاش متوافق مع مصالحه مش أكتر.. والسبب هو اللي بيعمله نتنياهو واللي اصبح صعب على المجتمع احتماله اكتر من كده... ف ربك يسهل يعني ويا رب تكون بداية لنهاية الحرب والإبادة..
اللي متابع السياسة من سنين، عمره ما كان يتخيل اللحظة دي تيجي... بس هي جت فعلاً، وبتتكتب دلوقتي قدام عيوننا كلنا...