🔴 أوروبا دلوقتي مهددة بكارثة نووية خطيرة.. والسبب؟! مفاعل تشيرنوبل النووي!

أيوه... تشيرنوبل اللي حصل فيه أسوأ تسريب إشعاعي نووي في تاريخ البشرية سنة 1986، واللي إشعاعه زمان غطى أوروبا كلها، ولحد النهاردة آلاف الكيلومترات حواليه تعتبر أراضي ميتة وسامة!

المفاعل ده يا صديقي من فترة روسيا ضربته بطيارة مسيرة.. والضربة دي اتسببت في ضرر أكبر من اللي أي حد كان متخيله، لدرجة ان الموضوع دلوقتي أصبح على رأس قايمة الأخطار النووية عالميًا، والوكالة الدولية للطاقة الذرية نفسها دلوقتي موجودة هناك بخبراء بيحاولوا يشوفوا مدى الخطر وبيحاولوا يصلحوه بأي ثمن قبل فوات الأوان..

⚫️ طب إيه اللي حصل بالظبط؟
خليني أحكيلك التفاصيل من البداية...

🔵 شوف يا سيدي... زي ما انت عارف، في سنة 1986 حصلت أسوأ كارثة نووية في تاريخ البشرية، لما مفاعل تشيرنوبل النووي الأوكراني، اللي كان جزء من أراضي الاتحاد السوفييتي وقتها، حصله انهيار أو Meltdown، وانفجر عشان ينشر مئات الأطنان من الإشعاعات والغبار النووي في الطبيعة والجو، ويلوث هواء أوروبا كلها، ويسمم مساحة تتجاوز الـ 1000 كيلومتر مربع حوالين منطقة تشيرنوبل، ويخليها غير صالحة للحياة!

ولسنين طويلة، الخبراء النوويين كانوا بيشتغلوا على احتواء الكارثة دي ومعالجة أثارها، ويبنوا حوالين المفاعل مباني مدرعة ضخمة عشان تحبس أكتر من 200 طن من المواد المشعة والغبار السام جواه، وتحمي العالم كله من أثار مدمرة لو المواد دي اتسربت.. وبعدها المنطقة المحيطة بتشيرنوبل كلها اتسمت (منطقة الإستبعاد أو الـ exclusion zone).. وأصبحت محرمة على البشر وغير مسموح بدخولها إلا للخبراء وتحت احتياطات وبذلات خاصة للحماية من خطر الإشعاع النووي..

🟡 وفضل الحال على ما هو عليه لأكتر من 36 سنة... لحد ما حصلت المشكلة يوم 14 فبراير اللي فات!
اللي حصل وقتها يا صديقي هو روسيا بعتت طيارة مسيرة انتحارية أو اللي بيسموها "كاميكازي درون"، وفجرتها في سقف جدار الحماية المدرع اللي بيحمي مفاعل تشيرنوبل النووي في أوكرانيا!
جدار الحماية بقى ده مش أي جدار.. ده مبنى مدرع بالكامل، سقفه مزدوج ومكون من طبقتين بينهم طبقة حماية عازلة ومضادة للمية والتآكل، اسمه (الضريح أو الـ Sarcophagus)...

الضريح ده تم بناءه مخصوص عشان يحيط بالمفاعل كله ويمنع تسريب أي إشعاعات نووية من الـ 200 طن مواد نووية سامة الموجودة جواه.. وشارك في بناءه اكتر من 40 دولة منهم دول الاتحاد الأوروبي ودول الـ G7 كلهم، واتكلف اكتر من 2 مليار دولار...

🟣 ونتيجة الضربة الروسية دي؟
حصل ثقب كبير في السقف المدرع، حجمه حرفيًا يسمح إنك تمرر عربية SUV ضخمة من خلاله بحسب تقرير لصحيفة The Kyiv Independent عن الموضوع هتلاقيه ف أول كومنت 👇 وهتلاقي صورته في الكومنتات!
الثقب ده فعليًا بقى معناه إن المواد السامة دي مبقتش متغطية ومقفول عليها بإحكام زي قبل كده.. بل أصبحت معرضة لخطر الطبيعة والهواء والمطر.. والمشكلة لم تقتصر على الثقب ده بس.. ده كمان حصل توقف تام في نظام التهوية الخاص بالمفاعل، واللي تم بناءه بمواصفات خاصة وتكنولوجيا متقدمة...

🟢 نظام التهوية ده يا صديقي نظام معقد جدًا، الغرض الأساسي منه هو انه بيحافظ على الضغط الجوي جوا (الضريح) انه يبقى أقل من الضغط الجوي اللي بره، عشان يمنع الإشعاع والمواد السامة من انها تتسرب لبره.. وده عشان زي ما انت عارف، دايمًا الهوا أو أي غاز بيتحرك من المنطقة اللي فيها ضغط أعلى لضغط أقل.. ف لو انت خليت الضغط جوه الضريح أقل من براه، هيفضل محافظ على المواد اللي جواه ومش هيسمح بتسريبها أبدًا.. وبالتالي هيمنع الإشعاع إنه يخرج..
بس لما السقف المدرع اتضرب؟

الهواء المشبع بالمواد السامة المشعة اللي جواه أصبح دلوقتي ممكن يتسرب لأي مكان حوالين تشيرنوبل بكميات لا تستوعب... وده خطر عالمي حرفيًا، مماثل بالظبط للخطر اللي حصل سنة 1986، واللي لحد النهارده ما زال بتتكتب عنه كتب وبتتعمل عنه أفلام ومسلسلات عشان تحكيلك هو قد أيه كان كارثي!

🟠 والأسوأ؟
الضربة كمان ولّعت في طبقة العزل المضادة للماء والصدأ والتأكل اللي كانت بين جدران الحماية المزدوجة، والنار فضلت مشتعلة فيها 3 أسابيع كاملة وفرق الإطفاء مش عارفة توصلها عشان تطفيها!
وعشان يقدروا يطفوها، اضطروا انهم يحفروا فتحات وثقوب جديدة في الجدران والسقف علشان يوصلوا للحرائق دي ويوقفوها بعد ما دمرت جزء كبير من الطبقة العازلة اللي هي أساس الحماية أصلًا... وده معناه إن الدرع اللي بيحمي المفاعل دلوقتي بقى فيه اكتر من ثقب، وطبقة الحماية بتاعته اصبحت شبه مدمرة!

🔴 وده معناه أيه؟!
معناه إن دلوقتي أصبح عندنا مبنى كان مصمم علشان يعيش 100 سنة على الأقل ويمنع أي إشعاع من التسرب، بقى متخرم ومليان ثقوب زي المصفاة، وبقى غير آمن وغير قادر على القيام بالوظيفة اللي تم تصميمه علشان يقوم بيها... يعني إحنا بنتكلم عن جرح مفتوح في أخطر مفاعل نووي على سطح الأرض!

🟣 ومع المطر والرياح، تخيل معايا لو المطر دخل على النفايات النووية دي؟ أو لو الغبار المشع طار في الهوا؟
إحنا بنتكلم عن سيناريو ممكن يكرّر كارثة 1986 بس بنسخة أخطر... ووسط حرب عسكرية ضخمة بين جيشين نظاميين كبار!

🔵 السؤال بقى؛ ليه روسيا تعمل كده؟
المفاعل ده مش مجرد مبنى... ده قنبلة موقوتة.. واللي حصل فيه يعتبر تهديد نووي حقيقي للبشرية كلها... فهل الهجمة الروسية دي كانت مجرد "حادث"؟ ولا روسيا بتلعب بالنار علشان تروّع أوروبا وباقي دول العالم وتمنع أي تدخل من أي حد في أوكرانيا؟
كل الاحتمالات مطروحة للأسف... خصوصًا إن دي مش أول مرة روسيا تلعب بالنار، ومن فترة ضربوا كمان محطة "زابوريجيا" النووية اللي بيتم اعتبارها الأكبر في أوروبا، وضربوا الجنوب الأوكراني اللي فيه محطات نووية تانية!

🟡⚫️ التحقيقات والأبحاث الرسمية اللي تم الكشف عنها دلوقتي من فرق الطواريء اللي شغالة هناك على إصلاح المفاعل إن لسه محصلش تسريب إشعاعي لحد دلوقتي.. بس الموضوع غير آمن على الإطلاق، ولحد دلوقتي لسه متمش احتواءه، بعد مرور حوالي 3 شهور تقريبًا من الضربة.. والمشكلة ان الإعلام مكانش بيتكلم عنه كتير وقتها، ولسه دلوقتي باديء الموضوع يتشاف ويتعمل عنه تقارير اخبارية كبيرة...

يا ترى أيه اللي هيحصل في الأيام الجاية؟ محدش عارف.. بس ربنا يستر ويتم احتواءه بشكل كامل، قبل ما تحصل أمطار أو رياح، أو أي حوادث طبيعية تتسبب في تسريب محدش هيقدر يحتويه..

هتلاقي صورة للثقب مع البوست تحت 👇 ومصادر إخبارية مقروءة ومرئية بتتكلم عن الضربة اللي حصلت، ومدى خطورة الوضع دلوقتي في المفاعل تحت في أول كومنت 👇
🔴 وفي النهاية لو وصلت لهنا، متنساش تعمل شير للمقال ده، عشان يوصل لناس أكتر والكل يفهم اللي بيحصل حوالينا في العالم دلوقتي..