🔴 الاحتلال بدأ بالفعل تنفيذ خطته لاحتلال غزة وتدميرها وتهجير سكانها… ودلوقتي بيمحوا حي الزيتون من على الخريطة!
في اللحظة اللي العالم كله مركز فيها على قمة ألاسكا بين أمريكا وروسيا، والكل مشغول بالتريندات اللي بتحصل على السوشيال ميديا، جيش الاحتلال دلوقتي بينفذ في صمت خطته اللي أعلن عنها من أسبوع تقريبًا، وبدون ما ناخد بالنا لإنهم بيقضوا حتى على الصحفيين...
طب أيه اللي بيحصل؟! 👇
🟢️ حي الزيتون، أكبر أحياء غزة وأكثرها كثافة سكانية، واللي بيتوصف دايمًا بإنه البوابة الجنوبية الشرقية للمدينة، بيتعرض دلوقتي لواحدة من أعنف عمليات القصف والتدمير الممنهج من ساعة ما بدأت الحرب...
البيوت بتتفجر فوق أصحابها، والمساجد بتتضرب وتتهدم، والمدارس بتتدمر، والسكان كلهم تقريبًا هربوا تحت تأثير القصف...
🟠 حسب تقديرات المركز الأورومتوسطي لحقوق الإنسان وشبكات صحفية، ف لحد دلوقتي، وفي خلال اليومين اللي فاتوا بس، في أكتر من 400 بيت اتساووا بالأرض واتمسحوا من على الخريطة، واكتر من 90 ألف إنسان اتهجروا من بيوتهم وخرجوا من المكان كله، في مشهد بيشبه مشاهد النكبة الأولى... بس المرة دي على الهواء مباشرة...
الاحتلال كمان المرة دي ما اكتفاش بالقصف التقليدي، لكن جاب تكنولوجيا جديدة للتدمير...
🔵 روبوتات متفجرة بتدخل تفجر البيوت بعد ما يطردوا أهلها تحت تهديد السلاح، وطيارات مسيرة كوادكوبتر Quad-copter صغيرة بتحاصر الناس في المربعات السكنية وتطلق النار بشكل عشوائي عشان تجبرهم على النزوح وترك بيوتهم للجنود عشان ينسفوها واحد ورا التاني..
يعني العملية مش حرب ضد مقاتلين، ولا حتى عملية عسكرية لها هدف عسكري واضح، الهدف هو تفريغ الحي من سكانه وتدميره بالكامل، عشان يدخلوا على اللي بعده لحد ما يخلصوا على اللي باقي كله...
🟣 المرصد الأورومتوسطي وصف اللي بيحصل بإنه جزء من عملية إ.با.دة منظمة، هدفها محو المدينة من الوجود... والدفاع المدني في غزة بيقول ان اللي بيحصل عبارة عن "إ.با.د.ة جما..عية ممنهجة"، وان خلاص مبقاش في مكان للنزوح، والجثث مرمية في الشوارع ومش قادرين يوصلولها من شدة القصف..
الناس متحاصرة ومبقوش عارفين يروحوا فين، وده انذار شديد الخطورة بإن الأيام والساعات اللي جاية هيكون فيها مجا.ز.ر أسوأ من أي حاجة حصلت قبل كده...
🟡 كمان اللافت إن ده كله بيحصل في نفس التوقيت اللي العالم كله فيه مشغول بقمة ألاسكا والاتفاق بين ترامب وبوتين.. أنا نفسي كنت هكتب عن القمة دي النهارده، ومكنتش مركز مع اللي بيحصل في القطاع من كتر ما هو التغطية الإعلامية عليه ضعيفة...
🔹️ يعني إسرائيل بتلعب على تشتيت الأنظار... وفي خضم ما احنا مركزين في المشهد الدولي، شغالة هي بتمحي أكبر حي باقي في غزة من الوجود تمهيدًا لاحتلال كامل للمدينة...
🟠 تاني هكررها..
المدينة اللي بقالنا سنتين عمالين نقول انها صامدة، وانها بتضرب مثل مشرف في الشجاعة والصمود في وجه القوة الغاشمة، الاحتلال خلاص بيقضي على ما تبقى منها... مسح كامل للبيوت، بالضبط زي ما حصل في شمال القطاع ورفح.. وتهجير للسكان... ولو انتهوا من مهمتهم، ف خلاص كده كل سنة وانت طيب مبقاش في اصلا مدينة اسمها غزة، كإنها اتمحت من الوجود...
🔴 وللأسف مش بس كده...
حكومة الاحتلال كمان بتحضر دلوقتي لمنح الموافقة النهائية على مشروع خطة هدفها بناء 3412 وحدة سكنية استيطانية ما بين مناطق القدس الشرقية ومستوطنة "معالي أدوميم"... ودي تعتبر آخر منطقة حيوية في الضفة الغربية، ولو اتبنت الوحدات دي ف هي هتفصل ما بين القدس الشرقية وباقي المدن المحتلة، وهتقضي نهائيًا على أي محاولة للاعتراف بدولة فلسطينية متصلة جغرافيًا..
طب يعني أيه؟!
🟢 يعني المستوطنات دي هتعزل المدن والأحياء نفسها عن بعضها، وتخلي الاحتلال موجود في وسطهم... وبكده مش هيكون في بينهم حدود جغرافية متصلة... يعني بالشكل ده؛ هيكون اصلا مفيش دولة متصلة جغرافيًا ينفع تتبني ولا يعترف بيها...
وكل ده بيحصل دلوقتي وبسرعة عشان يقطعوا الطريق على خطط دول أوروبا للاعتراف بالدولة الفلسطينية الشهر اللي جاي... والأبجح هو انهم مش بيخبوا.. لأ ده بن غفير وسموتريتش صرحوا بشكل مباشر ووش كده ان مفيش حاجة اسمها دولة فلسطينية أصلا وانهم مش هيسمحوا باقامتها تحت أي ثمن...
🟣 اللي بيحصل دلوقتي مش مجرد "خطر محتمل"... ده نهاية اللعبة أو End Game زي ما بيقولوا... حي الزيتون هو البوابة، والسيطرة عليه وتدميره هي أول خطوة لمحو مدينة غزة كلها، وتحويل سكانها لشعب مطرود للمرة التانية...
🔴 غزة دلوقتي مش لسه مستنية خطر وجودي قادم قريب… الخطر بدأ خلاص... غزة دلوقتي بتتدمر لحظة بلحظة قدام عيون العالم...