🔴 في 3 أخبار مهمين لازم تعرفهم... إيران دلوقتي بتمر بأسوأ جفاف شافته من 100 سنة، وإسرائيل بتحاول تستغل ده لإسقاط النظام من جوّه… وفي خبر (لسه مش مؤكد) ان السودان لأول مرة بيعترف رسميًا إن حلايب وشلاتين أرض مصرية!
وفي غزة، المقاومة النهارده الفجر نفذت واحدة من أكبر العمليات ضد الاحتلال من بداية الحرب!
⚫️ لو انت مش متابع اللي حصل في الشرق الأوسط خلال الـ 48 ساعة اللي فاتوا، فخليني أقولك ان ال 3 أحداث اللي حصلوا دول ممكن يقلبوا الموازين في المنطقة...
تعالى بقى معايا أحكيلك التفاصيل كلها باختصار، لإن كل حدث من الـ 3 اللي انت هتقرأهم في السطور الجاية دي، هو حدث تاريخي يستاهل بوست كامل لوحده... 👇
1️⃣ نبدأ بإيران…
🔴 تخيل بلد بحجم ومساحة إيران، فيها 90 مليون إنسان، بقالها 5 سنين مش عارفة تشرب ميه!
حسب تقارير صحفية بقالها فترة منتشرة على شبكات زي بلومبرج وسي إن إن، فـ البلد حاليًا بتمر بأسوأ موجة جفاف شافتها بقالها أكتر من 100 سنة... والسبب في ده هو التغير المناخي الرهيب اللي اتسبب في زيادة الحر وجفاف الجو، وتراجع معدلات المطر لأدنى مستوى ليها تاريخيًا، لدرجة ان درجات الحرارة في البلد دلوقتي بقت بتوصل لـ50 درجة بشكل مستمر، وخزانات المية أصبحت فاضية، وحسب بعض شهادات السكان، في مناطق في طهران الحنفية بتنزل تراب!
🔵 المسؤولين حسب التقارير بيفكروا دلوقتي انهم يقفلوا العاصمة كلها أسبوع ويرجعوا الناس كلها تشتغل من البيوت عشان يوفّروا كهربا وميه... وحاليًا في بعض المحافظات بتستلم الميه بـعربيات "التانكر" في الشوارع، والسلطات بدأت تقطع الميه عن البيوت اللي بتستهلك كتير...
الرئيس الإيراني بزشكيان قال في تصريح رسمي الأسبوع اللي فات إنهم قد يضطروا إلى "نقل العاصمة الإيرانية لمكان آخر بسبب الجفاف"! والحكومة الإيرانية قالت إن العطش والجفاف فالعاصمة قد يجبر 15 مليون نسمة من سكانها على النزوح داخليًا لمدن أخرى!
🟢 وفي وسط ده كله، بقى حصلت مفاجأة...
من شوية، طلع نتنياهو على شاشة الإعلام الإسرائيلي في خطاب ناري وغريب... والخطاب ده مكانش بيكلم فيه شعبه ولا بيحكي عن حرب غزة... لأ ده كان بيتكلم عن إيران.. وكلامه مكانش موجه للقيادة الإيرانية، بل موجه لشعب إيران نفسه!
🟣 نتنياهو في الخطاب بتاعه تباهي بالتكنولوجيا اللي وصلها علماء الإحتلال في مشاريع تحلية مياه البحر وتوفير المياه العذبة، وقال لهم بالحرف:
"إحنا أكتر (دولة) في العالم بنعرف نوفّر ميه… وساعدنا شعوب كتير قبل كده، ولو انتوا عايزين مساعدتنا، يبقى لازم تعملوا ثورة على النظام بتاعكم وتسقطوه... وأول ما تتحرروا من نظامكم، خبرائنا هينزلوا إيران كلها يساعدوكم ترجعوا تشربوا وتعيشوا!"
يعني… بالعربي كده… إسرائيل عايزة الشعب الإيراني يعمل ثورة على نظامه، عشان يساعدوهم يفكوا العطش والجفاف اللي عندهم!
🟠 انت متخيل البجاحة وصلت لفين؟
حاليًا الخطاب بتاع نتنياهو ده منتشر بشكل كبير في الإعلام الإسرائيلي ونقلته اكتر من شبكة أخبار عالمية، وهسيبلك اللينك بتاعه في الكومنتات، عشان تشوف بنفسك الحرب وصلت لفين... الحرب مبقتش مجرد صواريخ وطيران، لأ دول بدأوا يستعملوا العطش نفسه ضد الإيرانيين!
2️⃣ وعلى الناحية التانية من البحر بقى، في مصر، حصل خبر تاني بقاله كام ساعة منتشر على السوشيال ميديا كلها، بيتكلم عن حدث تاريخي بقاله سنين طويلة متعلق وعليه نزاع، وتم انهاءه أخيرًا بعد اكتر من ربع قرن من الشد والجذب...
🔴 السودان (يقال لسه وغير مؤكد) انها اعترفت بإن حلايب وشلاتين أرض مصرية!
شوف يا سيدي.. عشان تبقى فاهم بس، فالمثلث الحدودي على البحر الأحمر اللي بيضم منطقة حلايب وشلاتين، كان دايمًا ملف نزاع حساس بين مصر والسودان... ولسنين طويلة جدًا كان في صراع سياسي ودبلوماسي على مين صاحب المنطقة الحقيقي، مستمر تقريبًا من أيام الاستعمار البريطاني، من بدايات القرن العشرين!
وطول السنين دي، النزاع كان بيتم تغذيته من أطراف خارجية زي بريطانيا ولاحقًا إسرائيل، عشان يزرعوا الفتن والوقيعة بين الشعب المصري والسوداني، اللي هما المفروض تاريخيًا كانوا شعب واحد وبلد واحدة قبل تدخلات وفتن الغرب...
🟡 كل الأطراف الدولية اللي مكانتش عايزة استقرار للمنطقة كانت بتستخدم الملف ده كورقة تأجج نار الفتنة بين الشعبين، وآخر حاجة كانت حاصلة في الموضوع، كانت إن مصر أمرت بطرد القوات السودانية تمامًا من المثلث والسيطرة عليه بالكامل والسيطرة الكاملة على المنطقة بعد ما اتعرض الرئيس مبارك لحادثة اغتيال في أديس أبابا اتهم فيها عناصر من الخرطوم بالتورط فيها سنة 1995...
بس النهارده أخيرًا، وبحسب تقارير فرنسية نقلتها شبكات الأخبار المصرية والسودانية، الرئيس المصري عبد الفتاح السيسي اتفق مع رئيس مجلس السيادة السوداني عبد الفتاح البرهان، وتوصلوا لتوافق رسمي بين البلدين على اعتبار المثلث جزء من الأراضي المصرية...
🟣 وده بالفعل أنعكس على المفاوضات الجارية دلوقتي ما بين السعودية والسودان لترسيم الحدود البحرية بينهم، واللي -تمهيدًا لها- البرهان طلب من لجنة المفوضية القومية للحدود انهم يرسموا خريطة رسمية بتظهر حلايب وشلاتين داخل الحدود المصرية، عشان يقدروا يخلصوا الملف ده للأبد، ويرسموا الحدود البحرية مع الرياض!
طبعًا زي ما انت عارف، المثلث ده له أهمية استراتيجية قصوى لمصر، بدايةً من الموارد الطبيعية الكبيرة ولحد موقعه الجغرافي المطل على البحر الأحمر، واللي يعتبر واحد من أهم المواقع الاستراتيجية المرتبطة بالأمن القومي المصري وعمق مصر الاستراتيجي في إفريقيا والبحر الأحمر...
🟢 القرار بالشكل ده بيشيل ورقة ضغط من إيد أي طرف خارجي كان بيحاول يلعب على وتر الفرقة بين البلدين خلال الشهور اللي فاتت، وبيفرغ التهديدات الحدودية اللي كانت بتترسم على حدود مصر الجنوبية من مضمونها... وهو فعليًا قرار تاريخي لو تم تطبيقه فعلًا (لإن لسه لحد دلوقتي مفيش إعلان رسمي من السودان ومصر، خلي بالك من النقطة دي)... وربنا يحفظ البلدين...
3️⃣ بس الخبر التالت بقى، واللي حصل في غزة النهارده الفجر، كان مذهل وغير متوقع...
🔴 رتل من القوات الإسرائيلية متجه لحي الشجاعية في غزة، متكون من جنود ومدرعات ودبابات ميركافا، كانوا داخلين بأريحية بعد انسحاب جزئي تم من كام يو، وفاكرين إن الأرض مؤمنة... بالظبط نفس إحساس الثقة الكاذب اللي كان عندهم في كل الكماين السابقة...
بس المرة دي الكمين كان مختلف، عشان اللي ما كانوش عارفينه هو إن المقاومة كانت مفخخة الأرض كلها بألغام وعبوات ناسفة مرتبطة بنظم تفجير متسلسلة... وبالفعل مع أول تقدم للقوات، العبوات دي انفجرت عشان تدمر عشرات الآليات العسكرية وتتسبب في مصرع عدد كبير من الجنود، لحد دلوقتي لسه الاحتلال مأعلنش عنه بشكل مباشر...
🟠 حسب التفاصيل اللي أعلنت عنها كـ.تــ.ائـ.ـب المقاومة، فبعد ما القوات الإسرائيلية انسحبت من مناطق شرق غزة اللي كانت متلغمة، قدرت الفصائل تعد خسائر الاحتلال الفعلية على الأرض... وحسب ما نقلت شبكة الجزيرة، فالكمين ده هو واللي تم تنفيذهم خلال الكام اللي فاتوا، اتسببوا في تدمير52 آلية إسرائيلية، منهم 21 دبابة و18 ناقلة جند، والباقي جرافات وعربيات إمداد... ونتج عنه عشرات القتلى والمصابين...
فـ تخيل انت لما جيش الإحتلال يكون اتعرض لكمية الخسائر دي، ولحد دلوقتي لسه بيواجهوا مشاكل في تعبئة الجنود المطلوبين لخطة اجتياح غزة اللي وافق عليها الكنيست من يومين... يبقى يا ترى هيعملوا أيه لو قرروا يدخلوا فعلًا؟
🔵 يكفي إني أقولك ان في كلام منتشر حاليًا ونقلته وكالة الأخبار الفلسطينية "معا"، بيقول ان خطة الاجتياح دي مش هتتنفذ، وان جيش الاحتلال هينسحب مقابل دخول لجنة من الدول العربية لإدارة القطاع بدلًا منها..
وأكيد الخبر ده لو صحيح فعلًا، فهو هيكون بسبب ان الجيش مش قادر ينفذ الخطة دي بسبب كمية الخسائر، وكمان بسبب الرأي العام العالمي اللي أصبح بيدينهم بشكل مباشر وسافر لأول مرة في التاريخ... لدرجة ان صندوق الثروة السيادي النرويجي نفسه، (أكبر صندوق ثروة سيادي في العالم)، سحب استثماراته من الكيان بسبب الإبادة!
🔴 كالعادة هسيبلك مصادر كل الأخبار دي في الكومنتات تحت، ولو وصلت لهنا متنساش تعمل شير عشان البوست يوصل لغيرك والناس كلها تعرف آخر التطورات أيه، وأيه اللي حصل في المنطقة خلال الساعات اللي فاتت..